ყაზახეთის ტრანსპორტის სამინისტროს ოფიციალური განცხადებით, ქვეყანას პირველ ეტაპზე 10 ახალი გემის, მათ შორის სამი ტანკერის, სამი მშრალი ტვირთმზიდისა და ოთხი კომბინირებული ბორნის აშენება და ექსპლუატაციაში გაშვება აქვს განზრახული.
ყაზახეთის მიერ გადადგმული ნაბიჯი, პირველ რიგში, კასპიის ზღვაზე შეზღუდული გამტარუნარიანობის აღმოფხვრით, კერძოდ, დამატებითი სანაოსნო ფლოტის სიმძლავრეების გაზრდით არის განპირობებული.
ქვეყნისთვის სტრატეგიული ამოცანის შესასრულებლად, არსებული საწარმოო ობიექტების ბაზაზე, ყაზახეთი არსებული გემთმშენებელი ქარხნის (სამშენებლო დოკის) დამატებითი სიმძლავრეებით დატვირთვას გეგმავს.
ამჟამად ყაზახეთის სანაოსნო კომპანია Kazmortransflot-ი ახალი გემების მოდელების დიზაინზე მუშაობს, ახლო მომავალში დღის წესრიგში ყაზახეთისთვის საკუთარი გემების მშენებლობისათვის ქვეყნისთვის აუცილებელი დოკისთვის გამართული ინფრასტრუქტურის შექმნა ინება აუცილებელი.
ბოლო 20 წლის განმავლობაში ყაზახეთმა ეტაპობრივად კურიკის ნავსადგურის სიახლოვეს, ERSAI-ის ნავსადგურის სახელით ცნობილი გემთსაშენი დოკის განვითარება განახორციელა.
ფოტოზე წარმოდგენილია კურიკის ნავსადგურის 2014 წლის საერთო ხედი – გემთმშენებელი დოკის ტერიტორიის გარეშე და 2024 წლის ფოტო – საზღვაო დოკის ინფრასტრუქტურით.
ფოტომასალით დასტურდება მეზობელი ქვეყნის სტრატეგია ადგილობრივი გემთმშენებელი ინდუსტრიის განვითარებასთან დაკავშირებით.
უფრო კონკრეტულად კი, კურიკის ნავსადგურის სიახლოვეს, მის არეალში განთავსებული ERSAI-ის პორტის შესაძლებლობების გამოყენებით, ყაზახეთი ცდილობს ოდესღაც კაშაგანის ნავთობის საბადოსთვის ლითონის კონსტრუქციების დამამზადებელ საწარმოო ბაზას ახალი დანიშნულება მიანიჭოს.
ცნობისათვის, 2014 – 2018 წლებში ERSAI-ის ნავსადგურში, ლითონის კონსტრუქციების ბაზაში კაშაგანის ნავთობის საბადოსთვის განკუთვნილი ლითონის მილებისა და სხვადასხვა კონსტრუქციის მომზადება და ადგილზე, 200 კმ მანძილზე ხმელეთით ტრანსპორტირება ხორციელდებოდა.
დღესდღეობით ERSAI-ის ლითონის კონსტრუქციების ბაზა დაუტვირთავია და ყაზახეთს განზრახული აქვს ERSAI-ის ნავსადგური ორმაგი დანიშნულებით, კერძოდ, როგორც გემების მშენებლობის დოკი, ასევე სათანადო ფსკერდაღრმავებითი სამუშაოების განხორციელების შემდეგ ტვირთების გამტარ ნავსადგურად გამოიყენოს.
გემთსაშენი ქარხნის დატვირთულობა, სახელმწიფოს განცხადებით, გარანტირებული იქნება, რადგანაც სადღეისოდ კასპიის ზღვაში მცურავ 150-ზე მეტ მცირე სავაჭრო გემს, სხვადასხვა სახის შეკეთება ესაჭიროება, რომლის განხორციელებაც ყაზახეთის გემთსაშენ ქარხანაშია შესაძლებელი.
არხის ნავიგაციის პარამეტრების შესანარჩუნებლად ყაზახეთმა მიიღო გადაწყვეტილება, საკუთარი საზღვაო მიწახაპია დანადგარი შეეძინა.
იმისათვის, რომ გემთმშენებელმა დოკმა, იფუნქიონიროს აუცილებელია ფსკერდაღრმავების განხორციელება, რომელსაც ყაზახეთი კურიკის ნავსადგურში დამატებითი ტვირთების მოსაზიდად გამოიყენებს.
ახლახანს, შუა დერეფნის გამტარუნარიანობის გაზრდის მიზნით, ყაზახეთის ERSAI-ის სამრეწველო ნავსადგურმა, რომელსაც ERSAI Caspian Contractor მართავს, კურიკის ნავსადგურში ფსკერდაღრმავებითი პროექტის განხორციელებას შეუდგა.
ფსკერდაღრმავებითი დრეგირების სამუშაოების ჩატარება 2026 წლის იანვრიდან ივნისამდეა დაგეგმილი, დრეგირების საერთო მოცულობა, 1 მილიონი კუბური მეტრი იქნება.
პროექტის მიზანია ნავსადგურისა და მისი შესასვლელი არხის სიღრმის 5 მეტრამდე გაზრდა, რაც უზრუნველყოფს მთელი წლის განმავლობაში ნავიგაციას.
კომპანია ERSAI სრულად აფინანსებს კურიკის ნავსადგურში ფსკერის გრუნტის დრეგირების (CSD 650) დანადგარის მეშვეობით ნავსადგურში გრუნტის ამოხაპვის სამუშაოებს. საგულისხმოა, რომ ყაზახეთმა ფსკერის დრეგირების დანადგარი ახლახანს საკუთარი მიზნებისათვის შეიძინა, რომელსაც პერსპექტივაში სხვა ნავსადგურებში გამოიყენებს და არ მოუწევს ძვირადღირებული დანადგარის დაქირავება.
დასკვნა:
ყაზახეთი კურიკის ნავსადგურში ფსკერის დაღრმავებას ორმაგი დანიშნულებით – დამატებითი ტვირთების გატარებისა და ადგილობრივი გემთსაშენი სიმძლავრეების განვითარებისთვის გამოიყენებს.
