22-23 ოქტომბერს თბილისში „აბრეშუმის გზის” ფორუმი იმართება. ჩვენი ორგანიზაცია – „სატრანსპორტო დერეფნის კვლევის ცენტრი“, რომელიც მუდმივად ესწრებოდა და მონაწილეობას იღებდა წინა წლებში გამართულ ანალოგიურ ფორუმებში, ორგანიზატორების განმარტებით, უსაფრთხოების მოთხოვნების მკაცრი შეზღუდვების გამო, თბილისში გამართულ აბრეშუმის გზის წლევანდელ ფორუმს ვერ დაესწრება.
ჩვენი ორგანიზაცია – „სატრანსპორტო დერეფნის კვლევის ცენტრი“ ათ წელზე მეტია, აქტიურადაა ჩართული საქართველოზე გამავალი შუა დერეფნის პოპულარიზაციის, მისი კონკურენტუნარიანობის და ინფრასტრუქტურის გამტარუნარიანობის ამაღლების, ალტერნატიული დერეფნებიდან ტვირთნაკადების მოზიდვის, დერეფნის კავშირებადობის სრულყოფის, ცენტრალური აზიიდან საწარმოო შესაძლებლობების გამოვლენის და დამატებითი ტვირთების გადმორთვის პოტენციალის დადგენისა და მრავალი ასეთი ანალიტიკური ხასიათის რეკომენდაციის მომზადებაში.
ორგანიზაცია საკუთარი ვებ-გვერდის transcor.ge-ს საშუალებით აწარმოებს ყოველდღიურად განახლებად ანალიტიკას. გარდა ამისა, ორგანიზაცია ეწევა სატრანსპორტო დარგებში დასაქმებული პირების ადვოკატირებას.
„სატრანსპორტო დერეფნის კვლევის ცენტრი“ მუდმივად მონაწილეობს ადგილობრივ და უცხოურ სატრანსპორტო დერეფნებთან დაკავშირებულ კონფერენციებში.
სამწუხაროა, რომ წლევანდელ ფორუმში მონაწილეობას ვერ მივიღებთ და არ მოგვეცემა შესაძლებლობა, დეტალურად გავაშუქოთ იქ მიმდინარე მოვლენები, უწყვეტ რეჟიმში მოგაწოდოთ ფორუმის სიახლეები, აქტიურად მივიღოთ მონაწილეობა ფორუმის მუშაობაში და წამოვწიოთ შუა დერეფანში ჯერ კიდევ არსებული პრობლემური საკითხები.
