„უზბეკეთი – საქართველოსადმი ინვესტიციების განხორციელების თვალსაზრისით, ცალსახად ადასტურებს დიდ ინტერესს” – ამის შესახებ ეკონომიკისა და მდგრადი განვითარების მინისტრმა განაცხადა.
სამინისტროს ინფორმაციით, უზბეკეთის ინვესტიციების, ინდუსტრიისა და ვაჭრობის, ასევე ტრანსპორტის მინისტრებმა ანაკლიის ღრმაწყლოვანი ნავსადგურის ტერიტორიაზე მიმდინარე სამუშაოების, ასევე ფოთის საპორტო ინფრასტრუქტურის და თავისუფალი ინდუსტრიული ზონა დაათვალიერებისას, უზბეკური მხარე გამოითქვა სურვილი საქართველოს სატრანსპორტო სექტორში ინვესტიციების განთავსების მზადყოფნის შესახებ.
ეკონომიკის მინისტრის განცხადებით, საქართველო უზბეკეთთან მჭიდრო თანამშრომლობას აგრძელებს, რათა გაიზარდოს ორი ქვეყნის სავაჭრო-ეკონომიკური კავშირები, უზბეკეთიდან შემოსული ინვესტიციები, ტურისტული ნაკადები და ტვირთბრუნვა საქართველოს მიმართულებით.
მისივე თქმით, აღნიშნული პროცესი მნიშვნელოვნად შეუწყობს ხელს ქვეყნის ეკონომიკის გაძლიერებას და კიდევ უფრო გაზრდის საქართველოს როლს, კონკრეტულად კი, შუა დერეფნის კონტექსტში.
ასეთ ვითარებაში, არსებობს კითხვა: რამ შეუშალა ხელი უზბეკურ მხარეს 2023 წელს ფოთის თავისუფალ ინდუსტრიულ ზონაში უზბეკური ინვესტიციით დაანონსებული მულტიფუნქციური სასაწყობე ტერმინალის პროექტის განხორციელებას?
ერთ-ერთი მსხვილი საინვესტიციო პროექტი, რომელიც 2023 წელს ფოთის თავისუფალ ინდუსტრიულ ზონაში უზბეკური ინვესტიციით დაანონსდა, 30 ჰექტარ ტერიტორიაზე მულტიფუნქციური სასაწყობე ტერმინალის მშენებლობას ითვალისწინებდა. პროექტის საინვესტიციო ღირებულება 50 მლნ ლარს შეადგენდა და 100-მდე ახალი სამუშაო ადგილის შექმნას ითვალისწინებდა.
წინასწარ ცნობილი იყო, რომ პროექტის რეალიზება რამდენიმე ეტაპად განხორციელდებოდა. პირველ ეტაპზე გაყინული პროდუქციის სათავსო განთავსება, სადაც 1000 ტონა პროდუქცია დაეტეოდა. მეორე ეტაპზე 5000 კვადრატული მეტრი ფართობის დახურული სატვირთო საწყობის მოწყობა, ხოლო მესამე ეტაპზე 8000 კვადრატული მეტრი ფართობის დახურული ნაყარი ტვირთების საწყობის, ასევე დიდი ზომისა და საკონტეინერო ტვირთების ტერმინალის მშენებლობა იგეგმებოდა.
დღემდე გაურკვეველია უზბეკური ინვესტიციით – მულტიფუნქციური სასაწყობე ტერმინალის მშენებლობის პროექტის ბედი.
