15-16 მაისს ბათუმში გამართულ Argus-ის საერთაშორისო კონფერენციის ფარგლებში, ფოთში განთავსებული მულტიმოდალური Poti TransTerminal-ის შესაძლებლობები იქნა წარმოდგენილი.
Poti TransTerminal-ის გენერალურმა დირექტორმა, ოლჟას არიკბაევმა, ყაზახური ინვესტიციით აშენებული ტერმინალის წარდგენისას ხაზი გაუსვა ფოთში საკონტეინერო ინფრასტრუქტურის განვითარების, მიმდინარე ტვირთნაკადების, ტერმინალის ოპერირებისა და საქართველოს გავლით გადაზიდვების შემდგომი ზრდის პერსპექტივებს.
ტერმინალის ხელმძღვანელმა პრეზენტაციისას დეტალურად წარადგინა საკონტეინერო მოედნის სარკინიგზო ინფრასტრუქტურა, გადასატვირთი აღჭურვილობა და მულტიმოდალური გადაზიდვების ორგანიზების ოპერაციები.
განსაკუთრებული ადგილი დაუთმო ოპერატიულ საკითხებს, კერძოდ, ტერმინალისა და ნავსადგურის ინფრასტრუქტურის ურთიერთქმედებას, ტვირთების გადამუშავების სიჩქარეს, ტარიფების გამოყენებასა და ლოგისტიკური პროცესების გამჭვირვალობას.
ტერმინალის დირექტორის განმარტებით, ყაზახეთისა და ცენტრალური აზიის ტვირთნაკადების წარმომქნელი სამრეწველო რეგიონები გეგმაზომიერად იწყებენ საქართველოს გავლით შუა დერეფნის შესაძლებლობების ათვისებას. ტერმინალის დირექტორმა აღნიშნა, რომ განსაკუთრებული ზრდის პოტენციალი ყაზახური პროდუქციის ფოთის ნავსადგურის გავლით ექსპორტში შეინიშნება.
პრობლემების ჩამონათვალის დახასიათებისას აღინიშნა, რომ „კლიენტს ესაჭიროება გადაზიდვითი პროცესის გამჭვირვალობა და იმის ზედმიწევნით ცოდნა, თუ რა ვადაში გადაადგილდება მისი ტვირთი და როგორია სატარიფო შემადგენელი“.
ოლჟას არიკბაევის განმარტებით – „მარშრუტი თანდათან იძენს იმპულსს, ამასთან, ტვირთების მიმზიდველობას ესაჭიროება დრო, რათა ჩამოყალიბდეს და მდგრადი გახდეს“.
Poti TransTerminal-ი 2025 წლის მეორე ნახევარში შევიდა ექსპლუატაციაში. იგი საერთაშორისო ლოგისტიკური PTC Holding-ის ქოლგის ქვეშ ფუნქციონირებს.
ტერმინალი საკონტეინერო და გენერალური ტვირთების გადატვირთვას ემსახურება და ძირითადად ტრანსკავკასიური საერთაშორისო სატრანსპორტო TITR-ისა და CASCA+ მარშრუტების მომსახურებაზეა ორიენტირებული.
ტერმინალის ინფრასტრუქტურის შესაძლებლობებთან დაკავშირებით Argus-ის საერთაშორისო კონფერენციაზე აღინიშნა, რომ სარკინიგზო და საავტომობილო ტრანსპორტის გამოყენებით – 9.2 ჰექტარზე განლაგებულ ტერმინალს წლიურად 100 ათასი TEU-ისა და 350 ათასი ტონა გენერალური ტვირთის გატარება შეუძლია.
ტერმინალი თანამედროვე საერთაშორისო სტანდარტების სრული დაცვითაა აშენებული და უახლესი ხანძარსაწინააღმდეგო სისტემით და გრძელი სარკინიგზო ინფრასტრუქტურითაა აღჭურვილი, რომელსაც ერთდროულად 120 ვაგონის გადამუშავება შეუძლია.
ტერმინალი აღჭურვილია ორი უნიკალური პორტატული ამწით, რომლებიც საათში 50-მდე კონტეინერის დამუშავების შესაძლებლობას იძლევა.
პროექტის დაფინანსება მთლიანად კერძო ინვესტიციებით განხორციელდა. მისმა ღირებულებამ 31.5 მლნ აშშ დოლარი შეადგინა. პროექტის დაფინანსება საქართველოში ყაზახეთის სს „ხალიკ ბანკის“ შვილობილმა ბანკმა დააფინანსა.
დასკვნის სახით – საქართველოზე გამავალი დერეფნისათვის, ფოთში მულტიმოდალური ტერმინალის ფუნქციონირება, ორი არგუმენტის გათვალისწინებით უდაოდ მნიშვნელოვანია: პირველი – პირდაპირი უცხოური ინვესტიციის სახით ფინანსური შემოდინების და მეორე – ყაზახეთის მიერ საკუთარი ტვირთებით საკუთარი სატერმინალო ქსელის უზრუნველყოფით, რაც პერსპეტივაში გარანტირებული ტვირთების დამკვიდრების წინაპირობას წარმოადგენს.
